Hadien ba ka Al-Nassr ka la ioh jaka ban rung sha ka  Round-16 ha ka Asian Champions League Two kaba dang ïoh jingïakhun pyrshah ia FK Arkadag , ka kynhun Al-Nassr ka don ka jingkyrmen ba u Cristiano Ronaldo un wanphai biang sha ka madan ha ka jingïalehkai ha ka sngi Balang ha ka AFC Champions League Two pyrshah ïa ka FK Arkadag.

U Cristiano Ronaldo haduh mynta um pat ïoh rah ïa kano kano ka khusnam kaba heh naduh ba u la ïasoh bad ka klob na Saudi Arabia, bad kane ka jingïakob ka lah ban long ka lad kaba bha tam ïa u ban pynkylla ïa kata.

La jingïathuh ba u Cristiano Ronaldo um shym la ïashim bynta ha ki ar tylli ki jingïalehkai ba kham mynshwa jong ka Al-Nassr ha ka Saudi Pro League, namar ba u la sngew bynniaw ïa ka jingïapher ha ka liang pisa jong u bad ka klob, khamtam hadien ka klob  Al-Hilal ka la soi ia u Karim Benzema  na ka Al-Ittihad.

Ka Public Investment Fund (PIF) jong ka Saudi Arabia  ka ba bei pisa ia ki klob ba heh tam  kumka Al-Nassr, Al-Hilal, Al-Ittihad bad Al-Ahli. Hynrei u Ronaldo u sngew ba ka PIF ka ai jingïarap tang ïa kiwei pat ki klob bad ka la iehnoh ïa ka Al-Nassr.
 

Hynrei hadien ba u Ronaldo u la kyntait ban ïalehkai ha ka jingïalehkai kaba nyngkong, ka PIF ka la pynmih ïa ka jingpynbna kaba maham ïa u  Cristiano Ronaldo. Wat hapdeng kita ki jingkynthoh, u khlur barim jong ka Real Madrid u la bteng ban duh ïa ka jingïalehkai kaba ar ha ka lynti jingïalehkai.

U khlur na Portugal u la duh ïa ki ar tylli ki jingïalehkai ba khatduh watla u la long uba koit uba khiah pura.

Ka Al-Nassr ka la jop ïa ka klob ba bat ïa ka nam lahduh, ka Al-Ittihad, da 2-0 ha ka sngi Thohdieng, khlem u nongïoh Ballon d’Or san sien.

Ka Al-Nassr kan bteng ïa ka jingïakhun ban wad ïa ka khusnam AFC Champions League Two haba ka jingïakynduh bad ka Arkadag na Turkmenistan ha ka knockout stage ha ka meit jong ka sngi balang.

Ki  nong ïathuh khubor ki ong ba ki don ka jing kyrmen ba u Ronaldo un wanphai sha ka jingïalehkai bad un pynkut noh ïa ka jingïakhih jong u hadien ba u la duh ïa ki ar tylli ki jingïalehkai ba khatduh. Hynrei, u ne u khlur ialehkai ba la 41 snem ka rta u khlem pat ïalehkai shisien ruh ha kane ka jingïakob haduh mynta, bad ka dang sah jingïapeit la un ïasoh ne em bad ka kynhun ha kane ka AFC Jong ka kylla ba 16.