U khlur barim jong Real Madrid, u Toni Kroos, u la iada ïa u paralok barim jong u, u Cristiano Ronaldo, halor ka jingbym ïalehkai jong u na bynta Al-Nassr. U la ong ba lada ym don u Ronaldo ha ka League, ym don mano-mano ruh ban peit ïa ka Saudi Pro League. U Ronaldo na Portugal u la pynkhreh ban pynkut ïa ka jingbym ïalehkai jong u ha ki ar tylli ki jingïalehkai bad ban wanphai biang sha ka jingïakhun ba pura ryngkat bad ka kynhun jong u Jorge Jesus, hadien ba u la sdang jingïatrei biang ha kane ka taiew na ka bynta jingia lehkai ka ban wan.

U Ronaldo u la wanphai sha ka jingshah hikai bad Al-Nassr hadien ba u la iehnoh ïa ki ar tylli ki jingïalehkai ba khatduh kum ka jingpyrshah ïa ki jingthied ia ki rang ïalehkai ha u bnai  ba nyngkong. Mynta ka Al-Nassr kin ïalehkai pyrshah ïa Arkadag ha Turkmenistan ha ka Asian Champions League Two ha kane ka taiew, hynrei u Ronaldo um shym la thmu ban ïalehkai ha katei ka jingïalehkai.

U Toni Kroos, uba la ïalehkai ryngkat bad u Ronaldo ha Real Madrid, u la iada ïa ki jingïathuhkhana jong u, da kaba ong ba ym don mano-mano ban peit ïa ka Saudi Pro League lada u Ronaldo um ïalehkai ha katei ka lympung.

U la ong ha kawei na ki podcast jong u, katkum ka jingïathuh jong O Jogo: “Ka Saudi league ka long ka jingjia kaba phylla. Shuwa ka jingwan jong Cristiano Ronaldo, ym don mano-mano ruh uba la tip ïa ka. Mynta pat ki leh bym burom ïa uta u briew uba la pynpaw ïa ka ha ka pyrthei. Lada u Cristiano u mih noh lashai, kane ka league kan duh lut ïa ka jingitynnad jong ka. Khlem u Ronaldo, ym don mano-mano ban peit ïa ka Saudi league.”

U Ronaldo u la rai ban ym ïalehkai na bynta Al-Nassr hadien ba u la ïohi ba ka PIF, kaba long ki trai jong ki saw tylli ki klob ba hakhmat duh ha ka ri, ka la shah ïa u Karim Benzema ban mih noh na Ittihad sha Hilal, da kaba pynkhlain ïa ki nongpyrshah ba jan tam jong Al-Nassr ha ka jingïakhun khur nam lahduh.

Hynrei ka Saudi Pro League ka la kynthoh ïa u Ronaldo halor kane ka jingjia, da kaba pynmih ïa ka jingïathuh paidbah kaba ong: “Ka Saudi Pro League ka treikam katkum ka nongrim kaba suk: man la ka klob ka treikam hi da lade hapoh kajuh ka aiñ.

“Ki klob ki don ïa ki board, ki executive bad ki nongïalam jingïalehkai jong ki hi. Ki rai halor ka jingthied ia ki rang ïalehkai,  ka jing bei pisa bad ka rukom treikam ki don ha ka kti jong ki klob, hapoh ka jingïapynbeit pisa kaba thmu ban pynneh ïa ka jingïaineh bad jingïaryngkat ha ki jingïakhun. Kane ka rukom ka treikam kumjuh ïa baroh ki klob ha kane ka league.

“U Cristiano u la ïatreilang pura bad Al-Nassr naduh ka jingïawan jong u bad u la don bynta ba kongsan ha ka jingroi bad jingthmu jong ka klob. Kum u nongïalehkai ba kyrpang, u kwah ban jop. Hynrei ym don uwei ruh – wat la u long uba khraw katno katno – uba lah ban rai ïa ki kam shabar ka klob jong u.

“Ki jingïathied jingïalehkai ba dang shen ki pyni shai ïa kane ka jingïaleh laitluid. Kawei ka klob ka la pynkhlain da kawei ka rukom, katba kawei pat ka la jied kawei ka lynti. Kine ki long ki rai jong ki klob, hapoh ka jingpynbeit pisa ba la shah.

“Ka jingïakhun jingïaryngkat jong ka league ka kren hi da lade. Tang katto katne point ki jingïapher hapdeng ki saw tylli ki klob ba hakhmat, ka jingïakhun nam lahduh ka dang im bha. Kane ka jingïaryngkat ka pyni ba ka rukom treikam ka dang ïaid kumba la thmu.

“Ka jingthmu ka sah ha ka jingïalehkai phutbol – ha madan, ha ka jaka kaba dei – bad ha ka jingpynneh ïa ka jingïakhun kaba shisha bad kaba jingïaryngkat na bynta ki nongïalehkai bad ki nongpeit.”

U Ronaldo mynta u ïoh tulop kumba £400,000 shi sngi, hynrei u la long u nongïalehkai ba kongsan bha ha ka jingïakhun nam lahduh jong Al-Nassr ha kane ka samoi.

U la thep 17 kol ha 18 tylli ki jingïalehkai league, bad wat la u la dap 41 snem dang shen, u la shah ong ruh ba um dei ban shongthait satia.

U khlur barim jong Brazil, u Roberto Carlos, u la ong: “U Cristiano um lah ban sangeh, lano lano ruh. Lada u ju pyrkhat ban sangeh ïalehkai, ngan phone ïa u bad ong ïa u ban ym sangeh. U long u nongïalehkai uba mut shibun eh, ym tang ïa ki klob hynrei ïa ka ri ruh, ïa ki khynnah bad ki nongïalehkai ba dang samla. U dei ban ïalehkai phutbol haduh ba kut, wat lada da kawei ka kjat ne da ka jingïalehkai ba jingïaid jingïait. U pynphriang shibun ka bor bad ka jingïai jingïaroh ïa uno uno uba kwah ban sdang.”

“Na bynta kito kiba ieid ïa u Cristiano bad ïa ka phutbol, ka long kaba sngewtynnad ban ïohi ïa u ba u dang bteng ban thaw histori bad ban pynpra ïa ki record. Tang u Pele uba la thep 1,000 kol, hynrei u Cristiano u lah ban poi sha katei ka jingïoh jingïaroh. Nga ïohi ïa u ba u sngewkmen bad u don ka jingshaniah ha ka Saudi league. Nga thikna bha ba un poi sha katei ka jingïoh. Um ju mynthi satia, u dang ïalehkai bha, u long ka nuksa kaba bha, bad ka Portugal ka dei ban sngewkmen bad sngewburom.”